الجمعة، يونيو ٠٢، ٢٠٠٦

بحبك يا مصر


من تصويري

مرسلة بواسطة Dr cool بادّن في مالطا @ ٩:٢٥ م 2 تعليقات

من أحب قصايد عم نجم لقلبي

عـَـزّه
الغرام فى الدّمِّ سارِحْ
ْوالهوى طارح مَعـَـزّه
والحنين للقـُرب بارِحْ
والنـّـوى جارح يا عـزّه
يا إبتسامة فجر هَـلـِّـتْ بَـدِّدِتْ لِـيلي الحزين
يا ندى الصبح اللى سأسأ فوق خدودي الدّبْلـَـنين
بَلِّ شوقـْهُم
ْصَحَّى لون الورد فوقـْهُمْ
كُلِّ خـَـدِّ وشَـمِّ ورده
مين يُدوقهم غيرك انتي
ومين سواكي يا حياتي
يا ملاكي يا نسيم الحب لمّا هَبِّ هَزِّ القلب هَزّه
يا هوى الأحلام يا عزّه
الليلة دي جُمْ خـَـدونى يا ملاكي
جُوز تنابله ونـُصِّ دَسْـته من التيران
كنت بَحلم يا حبيبتي
كنت بَحلم بيكي إنتي
كُنـّـا قال أنا وانتي قال في جنينه خضرا
وِمْحاوِطـْـها البُرتُقان والسِّـيْسَـبان
وانتي جوّا قـْـرُنـْـفـُـلايَه بالعبير بتِستَحمّي
أجري يَـمِّـك يا هوايا تِسْـبـِقينى وتجري يَمّي
أحْضُـنِك واشرب عبيرك من شفايفك
والغصون واقفه وشايفه بـِـتـْـراعينا بسِّ خايفه
م العيون..
والعيون بتقول كلام
والكلام طاير حَمَام
بينادينا بالأغاني ويهادينا بالسلام
كنت بَحلم يا حبيبتي
كنت بَحلم بيكي إنتي
أيوه إنتي ومين سواكي
يا حياتي يا ملاكي
يا نسيم الحبّ لمّا هَبّ هَـزِّ القلب هزه
يا هوى الاحلام يا عزه
وأنطلـَـق فى الجوِّ فجأه يا حبيبتي صوت مفاجأه
صوت يخلـّـي الدَّمِّ يـِـجْمَدْ
:إصحى يا احمد
إصحى يا احمد
وانتهي الحلم الجميل
وابتدا الهَمِّ التـِّـقيل
:ـ فين إمام ـ
إنتوا مين??
- إحنا ناس مِكَلـَّـفين
تيجي سالك مش ح تتعب
واحنا طبعاً معذورين -
إنتوا دودِ الأرض والآفه المُخيفه
إنتوا ذرّة رمل فى عنين الخليفه
إنتوا كرباج المظالم والمآسي
إنتوا عِلـّه في جسم بلدي
إنتوا جيفه
- سَـكـِّـتوه ابن الكلاب
سفـّـِفوه من التراب
فتشوا كل الآماكن
طـَـلـّـعوا رْفوف الدّولاب
كَـمِّـموني يا حبيبتي
كَـتـِّـفوني يا حبيبتي
أوِّمونى ..
أعَّدوني
كُلَّ شعره ف جسمي بالعين فتّشوها
المخدّه من جِنانهم شرّحوها
وانتهى التـّـفتيش..ما فيش!!
صـدَّقيني ما تـْـخــَـفيش
هُوَّ فيه يا عَـزّه عندي ممنوعات ؟؟!!
غير بَحِبِّ النـَّـاس وبَـكْرَهِ السُّـكات؟
بَصِّ واحد م التنابله جُوّا عيني
وانتي عارفه عْنـَيـّـا صافيه وطيِّبين
زَيّ كلّ عيون بلدنا يا حبيبت شُبّاكين
ع القلب دُغري مْوَصَّـلين
كان مُناه يلمح علامة خوف بسيطه
طب حييجي الخوف مِنين ابن العبيطه
هو مين فينا الجبان واللا مين فينا اللي خان
اللي قلبُه بالمحبّه والأماني والربيع لاخـْـضَـر مِزَهَّرْ والأغاني
واللا كلب الصيد وأسياده الأبَطـْـره
أكّالين لحم البشر فوق الصّـواني؟
هُوَّ بَصّ فى عينى بصه إرتجف وف حلقه غصه
واتعوَجْ ومال وقال جملتين مش مفهومين
أصلُه شاف صورتين جمال ف العِـنين الطيّبين
مصر في العين الشمال
وإنتي في العين اليمين
أيوه إنتي ومين سواكي
يا حياتي يا ملاكي
يا نسيم الحبّ لمّا هَبّ هَـزِّ القلب هزه
 يا هوى الاحلام يا عزه
من أجمل قصائد عم نجم اللي بعشقه و بعشق قصايده

مرسلة بواسطة Dr cool بادّن في مالطا @ ٨:١٧ م 0 تعليقات